اتنصب عليك؟ الساعة الأولى بتفرق: اعمل إيه بالترتيب
قلت الكود، أو حوّلت، أو دخلت بيانات الكارت. مش وقت اللوم. الترتيب ده بيوقف الخسارة وبيزوّد فرصة إنك ترجّع حاجة.
كنسلدقيقتين قراءة
في أول ١٠ دقايق: وقّف النزيف
- اتصل بالبنك أو المحفظة من الرقم اللي ورا الكارت أو جوه التطبيق، واطلب توقيف الكارت أو تجميد المحفظة فورًا. ده أهم من أي حاجة تانية.
- غيّر الرقم السري من التطبيق، وافصل أي جهاز مش بتاعك من إعدادات الحساب لو التطبيق بيسمح.
- لو قلت كود لحد بيقول إنه من شركة المحمول: اتصل بالشركة من رقمها القصير الرسمي واطلب تجميد «بدل الشريحة» على خطك. بدل الشريحة هو اللي بيخلي رسايل البنك توصل للمحتال.
- لو حوّلت على إنستاباي: خدمة العملاء 15989، قول الرقم المرجعي للعملية، واطلب من بنكك طلب «النوايا الحسنة».
في أول ساعة: احفظ الأدلة
- متمسحش حاجة. الرسايل، المكالمات في السجل، صور التحويلات، الروابط، أسماء الحسابات. دي أدلة بتتقدم في المحضر وبيعتد بيها.
- خد سكرين شوت لكل حاجة ومعاها التاريخ والساعة.
- اكتب الحكاية بالترتيب في نوتة: مين اتصل، قال إيه، إنت عملت إيه، الساعة كام. وإنت لسه فاكر.
في نفس اليوم: بلّغ
- مباحث الإنترنت: الخط الساخن 108 شغال ٢٤ ساعة، والإدارة العامة لتكنولوجيا المعلومات على 0224065052 و0224065051، ومقر تلقي البلاغات في العباسية بالقاهرة. وتقدر تقدم البلاغ في أي مديرية أمن.
- الجهاز القومي لتنظيم الاتصالات: 155 لأي مكالمة احتيال باسم شركة محمول أو تحديث بيانات.
- الجهة اللي اتنحلت صفتها: البنك، البريد، شركة الشحن. بيحذّروا باقي العملاء.
- كنسل: بلّغ عن الرقم. البلاغ بياخد ثواني، وبيخلّي الرقم يتمنع عند آلاف غيرك قبل ما يرن.
السرعة بتفرق في حاجتين: إن البنك يلحق يوقّف العملية، وإن البلاغ يبقى والأدلة طازة. التأخير بيصعّب الاتنين.
الأسبوع اللي بعده
- تابع كشف الحساب يوم بيوم، وأي عملية مش عارفها بلّغ عنها فورًا.
- غيّر كلمات السر اللي ممكن تكون اتشافت، وفعّل التحقق بخطوتين على الإيميل والسوشيال.
- لو المحتال معاه صورة بطاقتك، قول للبنك، واعرف إن حد ممكن يحاول يفتح بيها حسابات أو خطوط.
وبعدين
الناس اللي اتنصب عليهم كتير جدًا، ومحدش منهم غبي. المكالمة متصممة عشان تشتغل على الاستعجال والخوف. اللي يفرق بينك وبين اللي بعدك إنك بلّغت.
