«عندك مخالفة مرور، ادفعها من اللينك ده»: الرسالة اللي بتنتحل صفة النيابة العامة والبريد
رسالة باسم البريد المصري أو النيابة العامة بتقولك إن عليك مخالفة وتطلب تدفع أو تتظلم من لينك. الحملة شغالة من شهور، والرابط الرسمي الوحيد للمخالفات هو موقع النيابة.
كنسلدقيقتين قراءة
الرسالة
«لديك مخالفة مرورية بتاريخ ٨/١/٢٠٢٦. تظلّم أو ادفع مخالفاتك من أقرب مكتب بريد أو من الرابط التالي». المرسل مكتوب باسم شبه البريد المصري، والرابط شكله رسمي من بعيد. وبتوصل لناس عندهم عربيات وناس معندهمش، بنفس التاريخ، لأنها بتتبعت بالآلاف.
الرابط بيفتح صفحة شبه بوابة حكومية، فيها خانة لرقم العربية أو الرقم القومي، وبعدها «ادفع المخالفة» ببيانات الفيزا. المخالفة مش موجودة. اللي بيتسجل هو رقم الكارت وتاريخه والكود اللي وراه.
اللي قالته الجهات الرسمية
في ١٧ يناير ٢٠٢٦ أوضح المركز الإعلامي لمجلس الوزراء، بعد التواصل مع الهيئة القومية للبريد، إن الرسايل دي مزيفة ومش صادرة عن البريد المصري، وإن روابطها هدفها اختراق حسابات المواطنين. والبريد أكّد إن أي رسالة حقيقية خاصة بالمخالفات بتحتوي على رابط واحد بس: موقع النيابة العامة الرسمي ppo.gov.eg. أي رسالة فيها رابط تاني مشبوهة.
الموقع الرسمي للاستعلام عن المخالفات ودفعها هو موقع النيابة العامة، وعنوانه بينتهي بـ gov.eg. أي عنوان تاني، مهما كان شكله، مش هو.
إزاي تفرّق في ثانية
- العنوان: الرسمي بينتهي بـ
gov.eg. المزيف بيستخدم اسم شركة أو كلمة قريبة من «أمان» أو «بريد» بنطاق عادي زي.com. - اسم المرسل: كتابة اسم شبه «البريد المصري» بحروف إنجليزي مش دليل على حاجة، اسم المرسل بيتزيّف بسهولة.
- التفاصيل: المخالفة الحقيقية ليها رقم لوحة ومكان ونوع. الرسالة المزيفة فيها تاريخ بس، ونفس التاريخ بيوصل لآلاف الناس.
- الدفع: البريد بيحصّل المخالفات في المكتب وبالبطاقة ورخصة العربية، مش من لينك في رسالة.
اعمل إيه
- متدوسش على اللينك، ولا حتى عشان تشوف. امسح الرسالة.
- لو عايز تتأكد إن عليك مخالفة فعلًا، اكتب عنوان موقع النيابة العامة بنفسك في المتصفح وادخل برقم العربية. مش من أي رابط جالك.
- لو دخلت بيانات الفيزا: وقّف الكارت من البنك حالًا، واطلب كارت جديد، وتابع كشف الحساب.
- بلّغ عن الرقم في كنسل، وبلّغ مباحث الإنترنت على 108 لو خسرت فلوس.
